المنار /منار الزبيدي
شكو بيها اذا نشرتي صورتج وكتبتي باسمج الصريح ؟
هواي رسائل تجيني باسم احمد علي سعد محمد …الخ بعضها بالعربي وبعضها بالانكليزي ومخلين صور ولد او فنان او لاعب
استغرب لمن يتكلم وياي تطلع فلانه !
اسالها ليش اسم ولد وليش مو اسمج وصورتج تكولي زوجي او اخوي او ابوي ميقبل !
بعض النساء مسويات حسابات وهمية بدون علم “المحرمين” وبعضهن يخافن من التحرش وبعضهن حتى ينشرن افكارهن وارائهن الي ينبذها المجتمع بدون مبرر
وبعضهن حتى يتواصلن ويا ناس محظور عليهن يتواصلن وياهم ..
مهما كان الحساب باسم ولد او اسم مستعار فهذا يتسمى هروب من الواقع و من المواجهه ..
شكو بيها لمن نتحدى كل شي ونعيش الحقيقة ونوضح للناس انو من حقنا نعيش حياتنا ونعبر عن ارائنا وقناعاتنا بدون خوف وتردد …؟
و شكو بيها لمن ننشر صورنا على الفيس والانستا؟ احنا مو عورة حتى نستحي من نفسنا والمجتمع مو محكمة حتى يحاكمنا احنا معايشين بمعتقل ولا محتجزين ومحد يشوفنا
جاي نطلع للسوق وللمدرسة وللجامعة وللاقارب ونسافر ونروح للزيارة وللطبيب ونطلع لكل مكان فليش نخاف نحط صورتنا من نكتب راينا او تجربتنا ؟
شكو بيها اذا تحدينا كل هاي المخاوف والقيود الي احنه صنعناها بترددنا وضعفنا واستسلامنا للعيب الكاذب والحرام المصطنع !
لو ردنا نعيش حياتنا بشكل طبيعي لازم نبتعد عن كل خوف وكل شي مخالف للطبيعة الحلوة ..
انت انسانة شكو بيها اذا عشتي حياتج بهدوء وحب وشجاعة وفرضتي نفسج على القيود السلبية القاتمة ومثل ما نتقبل الاخرين نخليهم يتقبلون وجودنا وصورنا وافكارنا ..
كسريها للمخاوف وكوني فخورة باسمج وافكارج وصورتج وصوتج…. شكو بيها اذا سويتيها ؟
صدكيني راح تكونين سعيدة وفخورة بنفسج
