لوما مقصرة ماتزوج عليها !!

المنار /منار الزبيدي
لما نجي نسولف وننتقد الرجال الي يتزوج على زوجته ثانية وثالثة وبدون سبب طبعا راسا يكون الرد السريع “لوما مقصرة وياه ” ماجان باوع لوحده غيرها وتزوج عليها !!
طبعا الرجل مو ملاك حتى مايقصر ودائما يخلي كل المسؤولية براس الزوجة المسكينة خاصة اذا كانت ربة بيت متعلمة او غير متعلمة تشوفها هي الي تطبخ وتنظف وتربي الاولاد وتدرسهم وتعتني بيهم يعني طباخة وشغالة ومعلمة ومربية وممرضة وايضا زوجة تقوم بالواجبات الزوجية غالبا ما يكون الزوج خارج البيت اقصد بعد العمل طبعا لو ويه اصدقائه لو بالكوفي لو بالسوك لو ياكلون لو يلعبون طاولي و غيرها ويضحكون ويسولفون الى ان يصير الليل وكل هذا الوقت الزوجة مثل الماكنة بالببيت تقوم بكل الاعمال لمن يجي الليل طبعا هي تعبانه جسديا وحتى نفسيتها تعبانه …هنا يجي الزوج الي شبع طلعة وضحك ويا الاصدقاء يباوع ع ملابسها وشعرها يكولها شبيج هاي النسوان تلبس اشكال والوان وبعدين يباع ع شعرها ويقلد عليه …….الخ وينتهي ذاك اليوم المتعب جدا بالنسبة للزوجة المسكية بزعل الزوج الي ياخذله اسبوع زعلان ويريدها تتوسل بي وتراضي ….
ما دري ليش ومنو كال انو الزوجة عليها كل الواجبات سواء كانت موظفة او ربة بيت منو كال لازم تطبخ وتنظف وتدرس ووووو و
عزيزي الزوج ترة انت تحملها فوك طاقتها وهذا موضوع مخالف للشرائع السماوية والانسانية وحتى القانون
ارحمها وساعدها وكون شريكها بكل شي هي انسانة من حقها تعيش حياتها ومن حقها تسمع كلمة حلوة وتذكر زين كلما اعتنيت بيها كلما اعتنت بيك اكثر ولاتظل تباوع لغيرها خاصة الي تشوفهن بالعمل او الاماكن العامة ترة هذني ماخذات قسطهن من الراحة والعناية زوجتك ملكة بس اعتني بيها وداريها واذا قصرت وياك وجهها وشوف شنو السبب الي خلاها تقصر شيل الحمل وياها وسمعها كلام حلو ترة هي شريكة عمرك مو تروح تدور زواج ثاني وين ماتكعد تكول مقصرة وياي اريد وحدة اداريني ….
تذكر العدالة الالهية بالمرصاد والله حلل الزواج باربعة بشروط صعبة ماتكدر انت تحققها ولازم اكو سبب يخليك تزوج واذا تمرضت مو حد للدنيا خليك وفي وياها وااهتم بيها لمن تشفى وخلي نفسك بمكانها لو تمرضت انت ماتعوفك ابد ..
اني مو قاسية بس اكو رجال كل همهم نفسهم والانانينة مالية عيونهم …
وانت همين الزوجة الطيبة حملي زوجك المسؤولية مو كلشي تخلي عليج حتى يشعر بحجم التعب والمسؤولية ويعرف واجباته الاسرية ..